Aðalfundur Alliance française  2011

Aðalfundur Alliance française verður haldinn fimmtudaginn 9. júní kl. 18:00 í húsakynnum félagsins í Tryggvagötu 8.

Fundarefni:
- Ársskýrsla forseta
- Samþykkt ársreikninga
- Kosning stjórnar
- Önnur mál

Rétt til fundarsetu hafa allir skuldlausir meðlimir Alliance française.

Laugardaginn 4. júní kl. 14 - 15  

Listasafn Reykjavíkur, Hafnarhúsinu.

Viltu vera memm?

Frítt er fyrir börn upp að 18 ára aldri.

"Amis-amies" (Viltu vera memm?) - lestur á íslensku frá kl. 14:00

Boðið verður upp á skemmtilega og fjölþjóðlega fjölskyldudagskrá í Hafnarhúsinu í tengslum við sýninguna Tomi Ungerer ? Teikningar og veggspjöld næstkomandi laugardag.

Tomi Ungerer er heimskunnur teiknari og rithöfundur sem hefur gefið út yfir 140 bækur sem hafa verið þýddar á yfir 30 tungumál. Engin bóka hans hefur verið gefin út á íslensku enn sem komið er.

Stór hluti útgefinna bóka Tomi Ungerer eru barnabækur, þar á meðal er "Amis-amies". Bókin segir sögu tveggja barna af erlendum uppruna sem verða vinir og átta sig á að þau eiga það sameiginlegt að þau eiga ímyndaða vini. Það er Sólveig Simha sem les söguna í íslenskri þýðingu Hlöðvers Ellertssonar og Sólveigar Simha. Áður en lesturinn hefst, verður örkynning á franskri tungu, og eftir lesturinn gefst börnunum kostur á fara í smiðju og teikna myndir í tengslum við söguna.
Dagskráin hefst klukkan 14:00 með upplestri úr bók Tomi Ungerer Amis-amies, sem á íslensku mætti þýða sem Viltu vera memm? 

Til að auka enn á ánægjuna af sýningunni, býður Alliance Française ykkur að kynna ykkur 17 bækur Tomi Ungerer, sem bókasafnið hefur nýlega eignast. Þessar bækur geta félagsmenn fengið að láni í eina viku.

17.-28. maí, tíu ævintýralegir dagar á aldarafmæli Alliance Française

Árshátíð Alliance Française í Reykjavík 28. maí kl. 19:30

Tilkynnið þátttöku ykkar sem allra fyrst með því að senda tölvupóst á

******

28. maí, kl. 14:00 og kl. 17:00, Tjanarbíó :
Rebbasaga skugga- og brúðuleikhúsið Petit Miroir flytur.

Rebbasaga er byggð á einu af grunvallarritum franskra bókmennta, Le roman de Renart. Hún fjallar um úlfinn Ysengrain og fjölskyldu hans í glímu þeirra við refinn í heillandi sýningu þar sem leikið er með skugga og brúður. Frá því að sýningin var frumsýnd árið 1993 hefur hún ferðast til meira en fjörutíu landa. Stórskemmtileg sýning fyrir alla fjölskylduna.

Vigdís Gunnarsdóttir og Þór Tulinius ljá rebba og félögum raddir sínar í sýningunni.

Samstarfsaðilar eru Listahátíð í Reykjavík og franska sendiráðið.

******

25. maí, kl. 20:00,
Kvöldstund með Michel Houellebecq í Norræna húsinu.

Michel Houellebecq er vinsælasti en jafnframt umdeildasti rithöfundur Frakka, bæði í Frakklandi og um heim allan, en bækur hans hafa verið þýddar á um 40 tungumál. Hann er  afar fjölhæfur höfundur, hefur sent frá sér skáldsögur, ljóð og ritgerðir. Hann hefur auk þess gefið út diska þar sem hann flytur ljóð við undirleik hljómsveitar, gert kvikmyndir og unnið með ýmsum listamönnum og hugsuðum, svo sem rokkaranum Iggy Pop, myndlistarmanninum Tomi Ungerer og heimspekingnum Bernard-Henry Lévy. Houellebecq hlaut virtustu bókmenntaverðlaun Frakka, Prix Goncourt 2010, fyrir skáldsöguna Kortið og landsvæðið.

Michel Houellebecq ræðir um verk sín við Friðrik Rafnsson, þýðanda, og Oddnýju Eir Ævarsdóttur, heimspeking og rithöfund, og svarar spurningum lesenda.

******

21. maí - 24. júlí: 
Yfirlitssýning á verkum Tomi Ungerer í Listasafni Reykjavíkur.

Tomi Ungerer er heimsþekktur höfundur, teiknari og myndskreytir. Hann er annálaður fyrir myndskreytingar sínar á barnabókum, pólitískar skopmyndir hans eru þekktar um allan heim, rétt eins og auglýsingar sem hann hefur gert, og erótískar teikningar sem gleðja augað. Stórmerkileg sýning á verkum eins merkasta listamanns Evrópu sem fagnar áttræðisafmæli sínu í ár. 

sans titre, 1970

sans titre, vers 1970

Í samvinnu við Sendiráð Frakklands, Sendiráð Þýskalands, Tomi Ungerer safnið í Strasbourg, Goethe Institut í Kaupmannahöfn, Listasafn Reykjavíkur og Listahátíð í Reykjavík. Sýningin er styrkt af Menningarsjóði Frakklands og Þýskalands.

Miðvikudaginn 4. maí kl. 20.00

Í Alliance Française, Tryggvagötu 8.

Emilie Mariat heldur fyrirlesturinn: "Íbúar í sjávarbyggðum Íslands og stefna stjórnvalda í sjávarútvegsmálum"

Emilie Mariat er að ljúka doktorsnámi sínu í félagslegri mannfræði við háskólann École des Hautes Études en Sciences Sociales (EHESS), undir stjórn Aliette Geistdoerfer. Rannsókn hennar er á félagslegum og fjárhagslegum afleiðingum á íslensk sjávarpláss sem stefna íslenskra stjórnvalda í sjávarútvegsmálum hefur. Miðvikudaginn 4. maí kl. 20.00 kynnir hún helstu niðurstöður rannsóknar sinnar.

Samhliða fyrirlestrinum, verður sett upp ljósmyndasýningin "Íslenskir sjómenn - Fiskveiðar í nútíð og fortíð", í Alliance Française. Sýningin verður opin frá 4. maí til 4. júní 2011

Þessi sýning er afrakstur tveggja vettvangsrannsókna í þjóðháttarfræðum, sem voru farnar hingað til Íslands árin 2005 og 2006. Tilgangur rannsóknarinnar var að kanna áhrif sjávarútvegsstefnu íslenskra stjórnvalda á sjávarplássin, þ.e. fjárhagsleg, félagsleg og menningarleg áhrif.
"Þessar myndir, sem eru teknar á Vestfjörðum, og í vestur- og austurhluta landsins, sýna fiskveiðar í öllum sínum fjölbreytileika, með mikilli áherslu á línuveiðar, sem komust aftur á kortið í lok 9. áratugar síðustu aldar, og urðu sérstaklega vinsælar á Vestfjörðum.
Með þessari sýningu viljum við einnig sýna fjölda staðbundinna úrræða, bæði samfélagslegra og einstaklingsbundinna, umsjón sjómanna með þeim kvóta, sem skip þeirra fær úthlutað, en hann er höfuðstóll sem þarf að viðhalda, gera arðsaman og varanlegan."

Viðburðurinn er skipulagður með stuðningi sendiráðs Frakklands á Íslandi.
 

Hátíð franskrar tungu

19. - 27. mars 2011

Belgía, Sviss, Kanada, Haítí, Marokkó, Senegal, Víetnam? Öll þessi lönd eiga sér sameiginlega arfleifð : frönsku og sameiginleg gildi.

Í marsmánuði ár hvert er haldin alþjóðleg vika franskrar tungu. Tilgangurinn með henni er að minna á að franska er móðurmál 200 milljóna manna um heim allan og sameina 870 milljónir íbúa og ríkisstjórna þeirra 70 landa sem eru í Alþjóðasamtökum frönskumælandi landa (Organisation internationale de la Francophonie). (http://www.20mars.francophonie.org/)
Á síðasta ári voru næstum 1200 viðburðir í 120 löndum um allan heim: ráðstefnur, sýningar, tónleikar, leikir o.fl.

Alliance Française tekur þátt í þessum alþjóðlega fagnaði og býður upp á viðburðaríka viku 19. ? 27. mars:

Laugardaginn 19. mars, Borgarbókasafnið, Tryggvagata 15
Samkeppnin « Allons en France » klukkan 14:30.

Franska sendiráðið og Félag frönskukennara á Íslandi standa að samkepninni « Allons en France » eða « Förum til Fakklands » fyrir menntaskólanema á aldrinum 16 til 20 ára sem stunda frönskunám. Í fyrstu verðlaun er tíu daga reisa til Frakklands þar sem íslenski sigurvegarinn fær m.a. tækifæri til að hitta hina 130 vinningshafana, sem koma allsstaðar að úr heiminum. Komið og hvetjið keppendur áfram þegar þeir tækla þemað «íþróttir og franska».

---------------------------------------------------------------------------
Laugardaginn 19. mars, Bókabúðin Eymundsson, Austurstræti

Bókabúðin Eymundsson tekur einnig þátt í hátíð franskrar tungu í samvinnu við sendiráð Frakklands, því franskar bókmenntir, tónlist og kvikmyndir verða í sviðsljósinu á dögum hátíðarinnar. Missið heldur ekki af veislu laugardagsins 19. mars; tónleikum með Jóni Þorsteini Reynissyni sem leikur listir sínar á harmonikku.

17:00 Harmonikkuleikur Jóns Þorsteins Reynissonar

--------------------------------------------------------------------------------
Frá 21. Mars til 11. apríl 2011 - Alliance Française, Tryggvagata 8
og Borgarbókasafnið, Tryggvagata 15

Þú ert að gleyma hestinum þínum,
Sýning á teikningum Suzanne Arhex.

Le net de suzette

Suzanne Arhex er ungur franskur myndskreytir og myndlistarnemi í Listaháskóla Íslands. Sýningin samanstendur af 14 teikningum sem eru myndskreyting við söngtexta Charles Trénet, ?Þú ert að gleyma hestinum þínum? («Vous oubliez votre cheval»).

--------------------------------------------------------------------------------
Sunnudaginn 20. mars, kl. 15 - Borgarbókasafnið, Tryggvagata 15.
Teiknistofa með Suzanne Arhex.
Le net de Suzette

Myndskreyttu franskan söngtexta

Suzanne Arhex og Sólveigu Simha, biðja börnin um að setja franskan söngtexta í myndir. Hvert barn dregur sér línu úr frönskum söngtexta, sem það setur í teikningu, án þess að vita hvernig hin börnin teikna aðrar línur söngtextans. Í lokin eru teikningarnar settar saman, og þá fyrst sjá börnin heildarmyndina.
Hámark 12 börn. Það er ekki nauðsynlegt að skilja frönsku til að taka þátt, söngtextinn verður þýddur á íslensku.
Samvinnuverkefni Alliance Française, Sendiráðs Frakklands á Íslandi og Borgarbókasafns Reykjavíkur.

------------------------------------------------------
Háskóli Íslands  - 22. til 24. mars,

Þriðjudagur 22. mars, kl. 12:00, Háskólatorg, 
Einstakir tónleikar með Jóni Þorsteini Reynissyni, harmonikkuleikara.

Miðvikudagur 23. mars, kl. 12:00, Háskólatorg  
Afríska trommusveitin Africa Lole stígur á stokk.

24 mars, kl. 16:00, Oddi 
Belgíska kvikmyndin «Si le vent soulève les sables» eftir Marion Hänsel verður sýnd, á vegum franska sendiráðsins og Alþjóðamálastofnunar.

---------------------------------------------------------------------------------------
Miðvikudaginn 23. mars, kl. 15.00-17.00 - Þjóðminjasafn, fyrirlestrarsal
 
Hringborðsumræður Er franska málið?

Þú þekkir slagorð Alliance Française í Reykjavík Franska er málið. Samt er mikilvægt að spyrja sig Af hverju ætti ég að læra frönsku núna? og velta mismunandi svörum fyrir sér. Þess vegna efna Alliance Française og frönskudeild Hugvísindasviðs Háskóla Íslands til hringborðsumræðna miðvikudaginn 23. mars frá kl. 15.00-17.00. Stúdentum, menntaskólanemum og öllum sem hafa áhuga á þessari spurningu er boðið til umræðna við 5 einstaklinga úr mismunandi starfsgreinum, sem segja frá því hvernig franska nýtist þeim í starfi og mögulegri þörf á frönskukunnáttu...

Þau eru:

- Silja Bára Ómarsdóttir, aðjúnkt í stjórnmálafræði við Háskóla Íslands.
- Katrín Ólína, hönnuður.
- Guðrún Vilmundardóttir, útgáfustjóri hjá Bjarti.
- Nína Björk Jónsdóttir, sendiráðsritari í Utanríkisráðuneytinu.
- Eiríkur Ingvar Ingvarsson, forstjóri Eden Mining ehf.

Hvert þeirra segir í stuttu máli frá því hvernig franska nýtist þeim í starfi sínu. Umræðurnar byggja á frásögnum þeirra.

Frú Vigdís Finnbogadóttir veitir þann heiður að opna þessar hringborðsumræður.

------------------------------------------------------------------------------
Laugardaginn 19., mánudaginn 21., þriðjudaginn 22.,
miðvikudaginn 23., fimmtudaginn 24. og sunnudaginn 27. mars :
Umhverfis jörðina á frönskum ævintýrum

Alliance Française hóf fyrir 2 árum að fara í grunnskóla Reykjavíkur og á bókasöfnin til að  kynna frönsku fyrir yngstu nemendum borgarinnar.
Í ár verður farin heimsferð á ævintýrum sem eru skrifuð á frönsku.

Fyrsta stopp verður laugardaginn 19. mars í Bókasafni Kópavogs kl. 15: Sólveig Simha les ævintýri frá frönskumælandi landi á íslensku og frönsku.

Mánudaginn 21., þriðjudaginn 22. og fimmtudaginn 24., fá nemendur Mealskóla, Austurbæjarskóla og Háteigsskóla að kynnast ævintýri frá frönskumælandi landi með Sólveigu.

Miðvikudaginn 23. mars, les Sólveig fyrir börn á Barnaspítala Hringsins og sunnudaginn 27. mars lýkur ferðinni í Gerðubergssafni.

Allir velkomnir laugardaginn 19. mars í Bókasafn Kópavogs og sunnudaginn 27. mars í Gerðubergssafn.

Jacques Demy mánuður í Bíó Paradís

4-27 mars, Bíó Paradís, Hverfisgötu 54, jarðhæð, 101 Rvk.

Félagsmenn Alliance Française greiða aðeins 600 kr. fyrir miðann, sýnið gilt félagsskírteini í miðasölunni.

Það er Alliance Française og Bíó Paradís ánægja að tilkynna að mars er Jacques Demy mánuð.  4 myndir verða sýndar:

•  4. - 6. mars : "Lola" (1960), 85 mín.

"Þetta er eins og Ítalía: eftir að hafa komið þangað einu sinni, langar mann alltaf að fara þangað aftur.", Jean-Luc Godard.

Roland, ungur maður, sem á erfitt með að fóta sig í lífinu, hittir kabarettdansarann Lolu og verður ásfanginn af henni. Hún ber hinsvegar þá von í brjósti að barnsfaðir hennar, sem yfirgaf hana þegar hún var ólétt, snúi aftur. Myndin er hylling til dans- og söngvamynda Hollywood en einnig til leikstjórans Max Ophuls. Ótrúlega vel heppnuð frumraun, full af fegurð og eftirsjá. Með Anouk Aimée.

http://demy.chez.com/60Lola.htm

http://www.imdb.com/title/tt0055093/ 

• 11. - 13. mars : "Regnhlífarnar í Cherbourg" (1964), 91 mín,
  Gullpálminn á Kvikmyndahátíðinni í Cannes

"Regnhlífarnar er bíómynd gegn stríði, gegn fjarveru, gegn öllu því sem við þolum ekki og sem vinnur gegn hamingju." Jacques Demy.

Hin klassíska söngvamynd um unga elskendur sem ná ekki að eigast. Tónlist Michel Legrand er sem sætasta hunang. Hlaut Óskarsverðlaunin sem besta erlenda myndin á sínum tíma og gerði Catherine Deneuve að stjörnu.

http://www.imdb.com/title/tt0058450/

http://demy.chez.com/63parapluies.htm

• 18. - 20. mars : "Englaflói" (1962), 89 mín

"Mig langaði til að taka ástríðu í sundur og sýna gangverkið", Jacques Demy.
Jackie og Jean eru ung og ástfangin. Þau eru einnig langt leiddir spilafíklar. Ástin blómstar í fyrstu og heppnin er með þeim í spilavítinu. En hvað gerist þegar lukkan snýst gegn þeim og þau fara að tapa peningum? Með Jeanne Moreau.

http://www.imdb.com/title/tt0056846/

http://demy.chez.com/62Baie.htm 

• 25. - 27. mars : "Stúlkurnar frá Rochefort" (1967), 120 mín.

"Að búa til glaðlega kvikmynd, þannig að áhorfandinn væri ekki eins leiður þegar hann færi út af sýningu myndarinnar, og þegar hann kom inn í salinn." Jacques Demy.

Tvíburasysturnar Delphine og Solange búa í hafnarbænum Rochefort þar sem þær kenna dans og söng. Þær dreymir um að slá í gegn í tónlistarheiminum og finna ástina í lífi sínu en átta sig ekki á að "hinir einu réttu" eru beint fyrir framan nefið á þeim.

http://www.imdb.com/title/tt0062873/

http://demy.chez.com/66Demoiselles.htm

Föstudaginn 11. febrúar frá kl. 19-23.

Safnanótt: Franskar kvikmyndir á Íslandi í nærmynd.

Alliance Française, Tryggvagötu 8, 101

Þann 11. febrúar frá kl. 19-23 verður hin árlega Safnanótt, af því tilefni sýnir Alliance Française sögu franskra kvikmynda á Íslandi. Við bjóðum ykkur að ferðast aftur í tímann og fara yfir 100 ára sögu franskra kvikmynda á Íslandi. Kvikmyndasafn Íslands gerði undanþágu fyrir Alliance Française og opnaði skjalgeymsluna sína!

Alliance Française býður ykkur að enduruppgötva arfleifð franskra kvikmynda á Íslandi, með sýningu á prógrömmum og plakötum franskra kvikmynda frá upphafi kvikmyndasýninga á Íslandi. Missið ekki af þessu tækifæri til að sjá í fyrsta sinn eða rifja upp tilvist þessara litlu fjársjóða, bæði þá sem eru svolítið gamaldags og eins hina, sem eru ótrúlega nútímalegir.

Einstakt tækifæri til að endurupplifa eða uppgötva andrúmsloft horfinna kvikmyndahúsa í Reykjavík.

Við þökkum Gunnþóru Halldórsdóttur, frá Kvikmyndasafni Íslands, kærlega fyrir stuðninginn og aðstoðina.

Franska kvikmyndahátíð 2011

Jólahlaðborð

Laugardaginn 11. desember kl. 19.30
Alliance Française, Tryggvagötu 8

Nú er aðventan byrjuð og þá um leið tími jólahlaðborðanna. Taktu strax frá kvöldið 11. desember fyrir Alliance Française, en þá verður okkar árlega jólahlaðborð. Í ár bjóðum við upp á ekta íslenskt jólahlaðborð, matreitt af kokkum Hafnarinnar, nýja veitingastaðnum við höfnina, sem var opnaður fyrir nokkrum mánuðum: www.hofnin.is

Á matseðlinum er meðal annars: léttsöltuð bleikjurúlla, grafinn lax, hreindýrapâté, hangikjöt, purusteik... sem öllu er rennt niður með frönsku víni.

Pantaðu strax í síma 552 38 70 á milli kl. 14 og 18 eða með því að senda okkur tölvupóst á alliance@af.is

Verð : 3.900 kr (½ flaska af víni innifalin) fyrir félagsmenn Alliance Française og 4.400 kr fyrir aðra.

Greiðist um leið og pantað er á bankareikning Alliance Française 0137-26-378, kt: 420169-1839.

Fimmtudaginn 2. desember, kl. 20.00,

Súkkulaðismökkun og konfektgerð, 
í Alliance Française, Tryggvagötu 8.

Aðventan er rétti tíminn til að eiga notalega kvöldstund, undirbúa jólin og ? smakka á súkkulaði.

Takið frá fimmtudagskvöldið 2. desember! Þá bjóðum við til súkkulaði- og konfektsmökkunar. Það verður talað um mismunandi tegundir súkkulaðis og hvernig hægt er að nota þær í konfektgerð.
Þátttakendum verður boðið að smakka mismunandi tegundir af súkkulaði og konfektmola, þeir fá uppskriftir að konfektmolum, sem er upplagt að útbúa á aðventunni !

Það er Viggó Vigfússon, kokkalandsliðsmaður og súkkulaðikonnessör, sem ætlar að kynna súkkulaði og konfektgerð fyrir okkur, en hann er nýkominn heim frá Lúxemborg þar sem
kokkalandsliðið fékk gullverðlaun fyrir heita rétti, silfurverðlaun fyrir kalda rétti og lenti í 7. sæti á heimslistanum.

Súkkulaðið sem er notað á námskeiðinu er hið franska Valrhona súkkulaði,www.valrhona.com, en það fyrirtæki var stofnað árið 1922. Valrhona er hráefni sem er viðurkennt og notað af bestu bökurum og súkkulaðigerðarmönnum og þeir leggja mikið upp úr að nýta möguleika súkkulaðisins á sem fjölbreyttastan hátt. Talað verður á íslensku og túlkað á frönsku, ef þörf er á.

Lengd námskeiðsins er um 1 klst. og 15 mín.
Verð: 3.500 (kr. 2.800 fyrir félagsmenn Alliance Française) ATH. Takmarkaður fjöldi.

Skráning á námskeiðið á alliance@af.is eða í síma 552 3870. Einnig er hægt að skrá sig á skrifstofu l'Alliance Française, Tryggvagötu 8.
ATH. Skráning verður að berast í síðasta lagi fyrir kl. 18 miðvikudaginn 1. des, þar sem Viggó þarf að fá að vita á miðvikudagskvöldið hve ma rgir koma, til að hann geti útbúið konfekt til að smakka.

Sýning á myndum úr afrískum bókum

Staður : Borgarbókasafn Reykjavíkur, Tryggvagötu 15
Hvenær: sunnudaginn 3. október kl. 15.00
Allir velkomnir

Borgarbókasafn Reykjavíkur og Alliance Française bjóða á opnun sýningar á myndskreytingum úr afrískum barnabókum á aðalsafni, sunnudaginn 3. október kl. 15.

Myndirnar koma frá ólíkum löndum og landsvæðum í Afríku. Þær eru bæði eftir útlærða og sjálflærða listamenn sem búa við mjög mismunandi aðstæður til listköpunar. Þessar myndir bera vitni um fjölbreytileika í áhrifum og tjáningarmáta og eru um leið dæmi um vel heppnað samspil munnlegrar og skriflegrar sagnahefðar. Hér má sjá sögur sem byggja á langri hefð við hlið samtímasagna, þetta eru bækur sem eru fullar af uppgötvunum og sögurnar eru óendanlegur innblástur fyrir skapandi listamenn sem eru meðvitaðir um mikilvægi afrískra bóka fyrir afrísk börn.

Við þetta tækifæri mun Solveig Simha segja söguna af héranum Leuk (Leuk Le Livre) á íslensku og einnig verða sýndar skyggnumyndir úr bókinni. Hérinn Leuk kemur víða við sögu í afrískum skólabókum og er því þekkt sögupersóna í Afríku. Sagan sem Solveig segir fjallar um Leuk og allt það sem hann lærir um lífið í samskiptum sínum við önnur dýr. Rithöfundarnir Leopold Sedar Senghor og Abduoulaye Sadji frá Senegal notuðu þessa skemmtilegu persónu í bókinni Hin ævintýralega saga af Héranum Leuk frá 1953, sem er safn vinsælla sagna sem margar kynslóðir Afríkubúa þekkja, allt frá Senegal til Madagaskar.

Staður : Nýlistasafnið, Skúlagata 28, 101 Reykjavík

27.-28. september, kl. 20.00

Úrval franskra hreyfistuttmynda.

Alliance Française í Reykjavík tekur þátt í RIFF 2010 með því að bjóða upp á úrval hreyfistuttmynda með stuðningi CulturesFrance.

Það er algengur misskilningur að hreyfimyndir séu eingöngu fyrir börn og að við framleiðslu þeirra séu ekki notaðar nema örfáar tækniaðferðir.  Það er sko aldeilis ekki svo!

Dagskráin hér fyrir neðan inniheldur úrval mynda frá Alþjóðlegu hreyfimyndahátíðinni í Annecy: http://www.annecy.org/. Þar er boðið upp á yfirlit franskra hreyfimynda síðasta áratugar.

Þessar stuttmyndir, sem eru sumar framleiddar af nemendum í hreyfimyndagerð og aðrar af fagaðilum, sýna hvað heimur hreyfimyndanna er margsluninn og lifandi. Á þeim 90 mínútum sem sýning myndanna á dagskránni tekur, eru tekin fyrir alvarleg málefni, t.d. seinni heimsstyrjöldin, átökin fyrir botni Miðjarðarhafs... en það er líka slegið á léttari strengi, t.d. fjallað um ástina.

Allar myndirnar eru franskar, með tveimur undantekningum : ein myndanna er ísraelsk og önnur indversk.

Rúsínan í pylsuendanum er svo "Orgesticulanismus" (http://www.youtube.com/watch?v=iDHfx9nde14), ein áhrifamesta hreyfimynd síðustu ára. Það má enginn missa af þessu!

Föstudaginn 24. september í Listasafni Reykjavíkur,  Hafnarhúsinu

"Hey, ekki menga svona !"

Gagnvirk sýning fyrir yngstu börnin, um flokkun og endurvinnslu sorps á Vísindavöku 2010.

klukkan 17:30, 18:30 og 20:00

Sýningin "Hey, ekki menga svona !" er bæði á íslensku og frönsku og er 45 mínútur að lengd. Aðalpersónan kallast Papolu en markmið hans er að fræða börnin um skaðleg áhrif sorps í náttúrunni og kenna þeim hvernig gefa má ruslinu annað líf með endurvinnslu. Hann sameinar brúðusýningar, söng, hringdans, leiki, fræðslu og föndur úr ónýtu dóti og vekur börnin þannig til umhugsunar um hvað sé best að gera við ruslið.
 
Vísindavaka 2010 verður haldin föstudaginn 24. september í Listasafni Reykjavíkur,  Hafnarhúsinu kl. 17:00-22:00. Sýningin "Hey, ekki menga svona !" verður endurtekin þrisvar sinnum klukkan 17:30, 18:30 og 20:00. Sýningin er í samvinnu Alliance Française í Reykjavík, Sendiráðs Frakklands á Íslandi og RANNÍS.

 
     

Dagur tileinkaður Charcot - Anne-Marie Vallin-Charcot flytur fyrirlestur:
"Daglegt líf í heimskautaleiðangri: ferð Pourquoi-Pas ? til Suðurskautsins á árunum 1908-1910",
á frönsku og túlkað á íslensku

Staður: Alliance Française, Tryggvagötu 8.
Fimmtudaginn 16. september, kl. 20.
Aðgangur er ókeypis og allir eru velkomnir meðan húsrúm leyfir.

Þann 16. september 1936 strandaði rannsóknarskipið Pourquoi Pas ? á skerinu Hnokka í Borgarfirði og með því fórst franski heimskautafarinn og leiðangursstjórinn Jean Baptiste Charcot ásamt allri áhöfn utan einum. Til minningar um þennan atburð sem skók mjög íslensku þjóðina hafa Alliance Française í Reykjavik og Háskóli Íslands undanfarin ár boðið upp á erindi þann 16.september þar sem sögulegt og vísindalegt gildi þessara leiðangra fyrr og nú eru reifuð.

Í ár er það dótturdóttir Charcots, Anne-Marie Charcot sem flyturerindi um daglegt líf í heimskautaleiðöngrum við upphaf 20.aldarinnar.
Hún fjallar einkum um ferð Pourquoi-Pas ? til Suðurskautsins á árunum 1908-1910, en í ár er öld liðin frá því leiðangursmenn sneru aftur úr þeirri árangursríku háskaför og var fagnað sem þjóðhetjum þegar þeir sneru aftur til Rouen í Normandíhéraði.
Í erindinu sýnir frú Charcot áður óbirtar myndir og gögn sem eru í eigu fjölskyldunnar.

Í samvinnu við Jörund Svavarsson, prófessor í sjávarlíffræði í Háskóla Íslands og formann stjórnar Háskólaseturs Suðurnesja.