Fréttatilkynning frá AF
Fyrlestur um fordóma og áróður í tungumálum
í tilefni „Tungumálaársins 2001“

Mánudagskvöldið 26. nóvember, í tilefni "Tungumálaásins 2001", heldur Jacques Melot fyrirlestur í Alliance Française í JL-húsinu við Hringbraut 121,3. haeð. Yfirskrift fyrirlestrarins er "Fordómar og áróður í tungumálum – Hugleiðingar um núverandi stöðu franskrar tungu og annarra."
      Þar verður leitast við að sýna fram á ákveðna fordóma varðandi tungumál, hvernig þeir eru notaðir og hvaða áhrif þeir hafa, fordómar sem eru kerfisbundið notaðir af þeim sem beita áróðri til að halda einu tungumáli fram á kostnað annars, einkum til að gera lítið úr eigin tungumáli.
      Viðfangsefni fyrirlestrarins verða m.a. þessi: rökin sem notuð voru á síðasta ári til að varpa þjóðtungunni fyrir róða og taka þess í stað upp ensku þegar Ísland tók þátt í "Eurovision" söngvakeppninni, fjöltyngi á alþjóðlegum ráðstefnum, hugmyndin um lingua franca, alþjóðlegt og alheimslegt tungumál, sambandið milli þjóðarvitundar, sjálfsmyndar, hugsunar, tungumáls og hugmyndalegrar frumsköpunar (listir, vísindi og tækni), tungumálið sem þáttur í því að ná yfirráðum (hafa áhrif á hugsun og hátterni), tungumálið sem Trójuhestur hugsunarinnar, hnattvæðingin og áhrif hennar á fjölbreytni tungumálanna, fordómar í garð Frakka, Íslendinga og tungumálakunnáttu þeirra.

      Fyrirlesarinn, Jacques Melot, er sveppafræðingur og stærðfræðingur að mennt og stundar jafnframt rannsóknir á ýmsum sviðum (á vísindasögu, málvísindum o.s.frv.). Hann er sérfræðingur í sveppaætkvíslinni Cortinarius og í nafnakerfi plantna og var um skeið ritstjóri Tímarits félags franskra sveppafræðinga. Hann hefur uppgötvað fjöldann allan af nýjum sveppategundum og gefið þeim opinbert nafn, þar af um það bil tuttugu á Íslandi.
      Hann hefur ásamt norskum og sænskum starfsfélögum sínum skrifað fræðirit um sveppi, "Cortinarius, Flora photographica", sveppaflóru sem hefur komið út á sænsku, frönsku, ensku og þýsku og er fimmta bindi verksins væntanlegt í júní 2002. Jacques Melot hefur þurft að beita fjölmörgum tungumálum varðandi starf sitt og hefur aukinheldur búið lengi fjarri heimalandi sínu, Frakklandi. Hann hefur því getað kannað tungumál, ekki aðeins frá sjónarmiði tungumálsins, heldur einnig frá sjónarhóli sálfræði, félagsfræði og stjórnmála í rúma þrjá áratugi.
      Árið 1997 stofnsetti hann á Netinu vefsvæðið Mycologia europaea sem nú er stærsti samskiptavefur í heiminum á sviði sveppafræði. Þetta alþjóðlega spjallsvæði er á ýmsum tungumálum og fjallar um sveppafræði gjarnan út frá mannlegum fræðum. Því er haldið úti af sveppafræðingum frá tuttugu og fjórum löndum, þar á meðal sveppafræðingum frá Norðurlöndunum.

      Að fyrirlestri loknum munu fara fram umræður og fyrirspurnir.
      Fyrirlesturinn hefst klukkan 20.30 og er öllum opinn meðan húsrúm leyfir. Aðgangur er ókeypis. Hann verður fluttur á frönsku og þýddur jafnóðum á íslensku af Torfa Tulinius, dósenti í frönsku.